दिल्ली उच्च न्यायालयाबाहेर बॉम्बस्फोट

संशयितांची रेखाचित्रे

देशाची आर्थिक राजधानी मुंबईला हादरवल्यानंतर अवघ्या दोन महिन्यांतच दहशतवाद्यांनी बुधवारी सकाळी हाय अलर्ट असलेल्या नवी दिल्लीलाच लक्ष्य करीत हायकोर्टाबाहेर शक्तिशाली बॉम्बस्फोट घडवला. सव्वादहाच्या सुमारास कोर्टाच्या स्वागत कक्षाबाहेर याचिकाकर्त्याची गर्दी लोटली असतानाच दहशतवाद्यांनी ‘ब्रीफकेस’मधील स्फोटके उडवून दिली. या धमाक्यात ११ जणांचा मृत्यू झाला असून ७६ जण जखमी झाल्याची माहिती मिळत आहे. त्यातील दोघांची प्रकृती चिंताजनक आहे.

कडेकोट सुरक्षाव्यवस्था असलेल्या संसद भवन व इंडिया गेटपासून अवघ्या दोन किमी अंतरावरील दिल्ली हायकोर्टाला दहशतवाद्यांनी पुन्हा टागेर्ट केले. धक्कादायक म्हणजे केंदीय गुप्तचर विभागाने जुलैमध्ये दिल्ली पोलिसांना दहशतवाद्यांच्या संभाव्य हल्ल्याची माहिती देऊनही सुरक्षाव्यवस्थेत कुचराई झाल्याचे स्पष्ट झाले आहे. २५ मे रोजी याच हायकोर्टाबाहेर झालेल्या स्फोटानंतर दिल्ली पोलिसांनी सर्वच गेटजवळ सीसीटीव्ही कॅमेरे बसवण्याची सूचना केली होती पण सरकारच्या हलगर्जीपणामुळे  दहशतवाद्यांनी नेमका लाभ उठवला. हायकोर्टाच्या गेटजवळील गर्दीत दोन दहशतवादी मिसळले आणि आपल्याकडील ब्रीफकेस पार्किंगमध्ये ठेवली. त्यानंतर काही मिनिटांतच स्फोट झाला.

हा स्फोट इतका मोठा होता की, १ किमीचा परिसर त्या आवाजाने दणाणला व स्फोटस्थळी ४ फूट खोल खड्डा पडला. या स्फोटाची चौकशी राष्ट्रीय तपास यंत्रणेकडे सोपवण्यात आली असून त्यासाठी २० सदस्यांची टीम स्थापन करण्यात आली आहे.

बॉम्बस्फोटानंतर हायकोर्ट आणि सुप्रीम कोर्टातील सुनावणीचे कामकाज काही काळासाठी स्थगित करण्यात आले होते. मात्र, दहशतवादी हल्ल्यापुढे कोर्ट झुकणार नाहीत, असा स्पष्ट संदेश हल्लेखोरांना मिळाला पाहिजे, अशी भूमिका सरन्यायाधीश एस. एच. कपाडियांनी घेतली आणि दोन तासातच कोर्टांचे कामकाज पुन्हा पूर्ववत सुरू झाले.